ఇక లింకులు కాదు, నేరుగా జవాబులే... అందరికీ అందుబాటులో గూగుల్ ఏఐ మోడ్

ఇంటర్నెట్‌లో సమాచారాన్ని వెతికే విధానాన్ని పూర్తిగా మార్చేసే దిశగా గూగుల్ ఒక కీలక ముందడుగు వేసింది. తన సెర్చ్ ఇంజిన్‌లో 'ఏఐ మోడ్' అనే సరికొత్త ఫీచర్‌ను విస్తృతంగా అందుబాటులోకి తెచ్చింది. శక్తివంతమైన జెమిని 2.5 సిస్టమ్‌పై పనిచేసే ఈ ఫీచర్, ఇకపై ఇంగ్లిష్ భాష వినియోగదారులందరికీ లభించనుంది. దీని కోసం ప్రత్యేకంగా సెర్చ్ ల్యాబ్స్‌లో సైన్ అప్ చేయాల్సిన అవసరం లేదు.

ఇప్పటివరకు ప్రయోగాత్మకంగా కొద్దిమందికి మాత్రమే అందుబాటులో ఉన్న ఈ ఏఐ మోడ్‌ను, యూజర్ల నుంచి వచ్చిన అద్భుతమైన స్పందన కారణంగా త్వరగా అందరికీ విడుదల చేస్తున్నట్లు నివేదికలు తెలుపుతున్నాయి. రానున్న రోజుల్లో భారత్‌లోని యూజర్లకు గూగుల్ యాప్‌లోని సెర్చ్ బార్‌లో ఈ ఫీచర్ కనిపించనుంది. సంప్రదాయ సెర్చ్‌లో ఏదైనా విషయం గురించి తెలుసుకోవాలంటే అనేక వెబ్‌సైట్ల లింకులు తెరిచి, సమాచారాన్ని మనమే క్రోడీకరించుకోవాల్సి వచ్చేది. ఈ సమస్యకు ఏఐ మోడ్ పరిష్కారం చూపుతుంది.

ఈ కొత్త విధానంలో, యూజర్లు తమ ప్రశ్నలను మరింత సహజంగా అడగవచ్చు. ఉదాహరణకు, "ఎక్కువ సామాగ్రి లేకుండా, ఇంట్లోనే 6-8 ఏళ్ల పిల్లలు ఆడుకోవడానికి మంచి యాక్టివిటీస్ ఏంటి?" వంటి సంక్లిష్టమైన ప్రశ్నలను ఒకేసారి అడిగినా, ఏఐ మోడ్ వాటన్నింటినీ ప్రాసెస్ చేసి, ఒకేచోట స్పష్టమైన సమాధానం అందిస్తుంది.

ఇంతేకాకుండా, ఒకసారి అడిగిన ప్రశ్నకు కొనసాగింపుగా మరిన్ని వివరాలు తెలుసుకోవచ్చు. సంభాషణను గుర్తుంచుకోవడం దీని ప్రత్యేకత. అలాగే, వాయిస్ కమాండ్స్ ద్వారా చేతులు వాడకుండానే సమాచారం పొందవచ్చు. గూగుల్ లెన్స్ ద్వారా ఫోటోలు తీసి వాటి వివరాలు తెలుసుకోవడం వంటి అదనపు ప్రయోజనాలు కూడా ఉన్నాయి. ఈ మార్పుతో గూగుల్ సెర్చ్ అనుభవం మునుపటి కంటే వేగంగా, సులభంగా, మరింత ప్రభావవంతంగా మారనుంది.